محمد الدماطي بعد خسارة بيراميدز: عظمة الأهلي مستمدة من شخصية جمهوره
علق محمد الدماطي، عضو مجلس إدارة النادي الأهلي ، على هزيمة الفارس الأحمر أمام نظيره بيراميدز بهدفين دون رد، مساء اليوم السبت.
وكتب محمد الدماطي، عبر صفحته على موقع فيسبوك، الآتي :”لأول مرة من خمس سنين حتكلم و انا عضو مجلس لكن بلسان حالي لوحدي ، عشان الامانة تحتم عليا دة ، و عارف سيل النقد اللي حينزل عليا و تعليقات نقد علي الجانب الفني اللي انا واثق ان شاء الله انة مع الوقت اكيد حيتصلح و ثقتي كاملة في ادارة الكورة علي تخطي الصعاب ، لكن فكرة اني عيشت حياتي كلها في المدرج تخليني اقول الكلمتين دول “.
وتابع :” لازم اعادة نظر سريعة في نظام دخول الجماهير ، لا نظام الfan Id ولا اسعار التذاكر بتدخل نوعية جمهور الاهلي بتاع زمان و لا فئات الشعب اللي بتحب الاهلي و الكورة بجد ، لازم سعر التذكرة ينزل لحد ٢٥ جنية عشان اي حد يوصل الملعب رايح جاي و ياكل حاجة حيدفع زيهم مرتين يعني الماتش الواحد حيقف باقل حاجة ٧٥ جنية و دة يخلي الناس اللي مرتباتها ٣ و ٤ الاف جنية في الشهر يقدر يروح علي الاقل ٣ ماتشات في الشهر ، عكس دلوقتي اللي الماتش بيدخل في اقل حاجة ١٥٠ جنية ، نظام الحجز يرجع زي زمان من قدام النادي منافذ و شركات الاتصالات كلها مش الرعاة بس ، و الشراء بالبطاقة و رقم التليفون و يتعمل استعلام امني لو في مشكلة التذكرة بتقف من علي البوابة زي اوربا ، و تتفتح الملاعب بسعة كاملة ، احنا مصر و نعرف نامن اي عدد و في اي وقت مفيش دولة في المنطقة عندها ربع استقرارنا الامني “.
وأردف :” لو في حاجة حاسس اني مقصر فيها هي اني مش قادر اشوف المدرج مقصور علي مجموعة معينة ، اللي حصل في ٢٠١١ و ربط الكورة بالسياسة كانت غلط مش حيتكرر تاني ان شاء الله ، محدش اساسا يقدر يفكر يهز الاستقرار اللي احنا وصلنا لة بعد معاناة رهيبة ، دة لو حد حب بس يفكر يدخل سياسة تاني بقية الجمهور هي اللي حتسكتو مش الامن حتي عظمة النادي الاهلي هي مستمدة من شخصية جمهورة ، و جمهورة هو جمهور المدرج ، لو الشخصية دي مع الوقت تاهت حتبقي خطر كبير علي رفعة النادي في المستقبل”.
