أبرز تصريحات سامي قمصان خلال المؤتمر الصحفي
أحمد حسان
بشكر كابتن موسيماني على الفترة اللي قضاها معانا اتعلمت منه كتير جدا
بشكر اللعيبة على الفوز كان في شوية لغبطة الأول بس الحمد لله قدرنا نسيطر على الكرة ونقدم أداء كويس ومكاسب المباراة كتير جدا سواء على مستوى النتيجة وكمان رجوع لعيبة كتير لمستواها وعودة ناس من إصابات زي بدر بانون و محمد محمود
عودة اللاعبين الدوليين هيدينا قوة وباذن الله نقدر نرجع الدوري تاني للأهلي
خلينا نتفق أن اسم النادي الأهلي إسم كبير واننا نقدم أداء كويس ونكسب ده طبيعي الأهلي دايما هو البطل
موسيماني حقق نتائج كبيرة وعمل أداء كويس ولعبنا كورة حلوة وكسبنا الزمالك خمسة وكسبنا الإسماعيلي سكور بنفس اللعيبة اللي في الملعب النهارده
حالياً بفكر بطريقتي وبشغلي وبنحاول نرجع اللعيبة من الإصابات ونرجع بيهم لمستواهم المعهود
الجمهور مستني أداء ونتائج وبطولات لأن جمهور الأهلي مختلف
مجرد أنك تكون مدير فني للنادي الأهلي حتى لو مباراة واحدة ده شرف كبير جداً جداً وأتمنى تتويجنا باللقب سواء انا موجود أو لا
مهم جداً أن حس التهديف يكون موجود عند المهاجمين وده بيجي بالمشاركة في المباريات ولكن وصول المهاجمين للمرمى مهم جداً ومش لازم المهاجم يسجل ممكن يعمل دور تاني ويكون محطة يوصل زمايله للجول
طول ما اللعيب بيحاول لازم نقف جمبه والتوفيق هيجي هيجي
شريف الموسم اللي فات هداف الدوري وحسام حسن مع سموحه كان هداف وبيرسي تاو لاعب جيد ويجيد التهديف وكذلك صلاح محسن
ديانج اتصاب إصابة خفيفة امبارح في المران .. وعبد المنعم هيكون معانا بعد أربع أيام وحمدي فتحي بكرة هيكون موجود
متولي شد خفيف في السمانة. كنت عامل حساباتي أن ديانج هيبدأ ولكن إصابته جعلتنا ندفع بمتولي في البداية وبشكره جدا على أدائه النهارده
مهم جداً تحط طريقة اللعب على أساس منافسك والنهارده لعبنا بطريقة مناسبة وقدرنا نلعب على نقاط الضعف لفريق أيسترن كومباني المحترم وممكن الماتش الجاي نغير طريقتنا تماماً عن مباراة اليوم
هندخل معسكر مغلق بإذن الله من يوم الجمعة استعداداً للزمالك
كابتن الخطيب بشكره جداً على ثقته فيا وبشكر مجلس الإدارة وباذن الله أقدر أعمل المطلوب مني حتى لو ليوم واحد .. مش حاجة جديدة من كابتن الخطيب أو النادي الأهلي أنه يثق في ولاده وبشكرهم جداً على الدعم اللي شوفته اليومين اللي فاتوا
بشكر جمهور الأهلي جداً على ثقته ودعمه ليا وبإذن الله نكون عند حسن ظنهم
