أساطين العامية المصرية ينشدون للوطن و الحياة و الإنسان على منصة بيت الشعر بالأقصر
أساطين العامية المصرية ينشدون للوطن و الحياة و الإنسان على منصة بيت الشعر بالأقصر
صوت الأمة العربية
أقام بيت الشعر بالأقصر اليوم السبت ١٦ يوليو ٢٠٢٢م أمسية شعرية للشعراء: حسانين السيد، ماجد أبادير، مصباح المهدي، وقام بتقديم الأمسية الشاعر حسين القباحي مدير بيت الشعر بالأقصر.
بدأت الأمسية بالشاعر حسانين السيد مواليد ٣٠ يناير ١٩٤٦، شاعر عامية صدر له:
أنشودة العطش
وتريات المغني العجوز
وتم تكريمه في برنامج “البندقية والقلم” كمقاتل في حرب الاستنزاف وحرب أكتوبر، كما تم تكريمه من عدة جهات ثقافية مصرية.
صباح الخير ..
على عيوني اللي بتفتَّح في هذا الصُّبح
على رغيف الأمان لليوم ..
على صورتي اللي في الألبُــوم ،
وذكراهــا اللي راح تفضل ..
…………………. مع شِعري اللي ضد القُبح !!
*
صباح الخير ..
على ( أُمِّي ) اللي في البرواز ،
وقلبي ( إزاز ) مايستحملـش نظرتها ،
………… وبتقول لي في طلِّتها : ماتستعجلش !!
*.
صباح الخير ..
على ( سطل ) الحليب جنبي .. وماشربتوش ،
والاقي وشوش بتنده لي : بتُصرخ جوع ،
واقوم مفزوع على وطني اللي بات موجوع ،
واقول لامِّي في بروازها :
………. حليبك ياامَّة في قلبي .. ولا نسيتهوش !!
*
تـرُد تقول لي : ياولدي .. صباح الخير !
ثم تلاه الشاعر ماجد أبادير حاصل على بكالوريوس التجارة من جامعة سوهاج، عضو اتحاد كتاب مصر وعضو إتيليه القاهرة، شاعر عامية مصرية وكاتب في صفحات الرأي، صدر له:
امبارح شفتك-كام حلم- نفسي اغنيلك فرايحي، ملكيش صور عندي.
كما نشرت له العديد من القصائد في المجلات والدوريات الأدبية.
مش كان م الأول ..
تاخد نفس اللون الباهت ..
وتتسمي بأسم من أي كتاب ..
م الكتب المش ممنوعة ..
وتعلم قلبك .. حتى إن مات م الخوف ..
ميدقش دقات مسموعة ..
و تخزي شيطانك ..
أهي جات الشمس عليك ..
وشافوك فرع اخضر حي .. ناصب طولك ومزهزه ..
ع الشجرة الميت جذرها ..
من ميت سنة واكتر ..
مش واخد نفس ملامح أبوك .. ولا جدك ..
ولا فيك ريحة دم اخواتك ..
اهو قالوا عليك ..
واختتمت الأمسية بالشاعر مصباح المهدي شاعر عامية صدر له عدد ١٦ ديوان شعر عن الهيئة المصرية العامة للكتاب والهيئة العامة لقصور الثقافة والمجلس الأعلى للثقافة، فاز بجائزة شعر العامية من اتحاد كتاب مصر، عضو مجلس إدارة النقابة العامة لاتحاد كتاب مصر.
حلمت بحد بيقول لي
صباح الخير
بلا تكشير
ماقشرشي الغضب فوقي..
ولا خربط في ميت حاجة
كأنه بيعدل الحاجة
اللي ماسكة الكون
حلمت بحد بيطبطب على قلبي
بكف حنون
وبيقول لي
صباح الخير
حلمت بقعدة فوق أعلى جبل وياه
بنتفرج على العالم كأنه علبة الكبريت
فلا جبل الأسى شايفين
ولا سامعين صراخ مساكين
وحاسين بس نبض قلوبنا بأيدينا
مافيش غيرنا في دنيا الله
