شاعرة العامية سوزان محمد تتألق بقصيدة ..جمال الدنيا أغنية
شاعرة العامية سوزان محمد تتألق بقصيدة جمال الدنيا أغنية
تألقت شاعرة العامية سوزان محمد عبر صفحتها على مواقع التواصل الاجتماعى بقصيدة جديدة بعنوان جمال الدنيا أغنية فإلى نص القصيدة …
حكايتي مع الأغانى جمال
جمال الدنيا أغنية
بتسحرنى بألْف خيال
و قصة حب وردية
طبيعى الناس بتتأثر
بغنوة جميلة طربية
لكن أنا حالتى فيها جنان
و حتى الكلمة دى شويه
أثرها زيادة عندى كمان
و حالتى دى حالة فردية
و أحلى جنان مع الألحان
باخُش فْ نشوة موسيقية
بَعيش اللحظة بالتفصيل
بَعيشها كإنى أنا هيَّه
و بَفصِل عن حياتى تمام
و بابقى ف دنيا حاجه تانيه
ساعات بارقُص و باتنطط
و بابقى ساعات رومانسية
و بين شطين أنا و مَيَّه
و بين أغنية وطنية
و غنوه تجيب وجع لفراق
و غنوه شوق و حِنِّيَّه
و بين الحال
و عكس الحال
أبَدِّل حالى فى الثانيه
و آخِر يوم فى صَيفِية
وراه رِجعِت لى شتوية
و غنوة ساعات تبكينى
أفضفض دَمعة فضِّية
و غنوة ساعات تنسينى
تاخُدنى لجَنَّة علوية
و مهما اسمع أغانى كتير
كتيره و مش مِكَفِّيَّه
حياتى بدون أغانى مُحال
سَمايا و قمرى و المَيَّه
و لو تهدينى أغنية
هدية كأنها مِيَّه
حياتى بَعيشها ألْف حياة
و ألْف حياة فى أغنية ..
