د مي جمعه تكتب … السوشيال وتفكك البيت
السوشيال ميديا دخلت كل بيت مصري و بقت هي الوسيط الاساسي بين افراد الاسره الواحده بدلا من الحوار المباشر واللمة اللي كانت بتجمع الكل حوالين ترابيزه واحده اصبح كل فرد قاعد في اوضه ماسك موبايله وعايش في عالم لوحده بيتابع صفحات وتريندات وفيديوهات بتتشكل بيها دماغه وبتتغير بيها نظرته للحياه وللعلاقات وللاهل نفسهم الاب بقى مشغول بالشغل والاخبار والاخبار الكاذبه والام بقت بتقارن بيتها ببيوت بتتشاف على الشاشه شكلها مثالي وبتحس بتقصير دايم والاولاد بقوا بيتعلموا قيم جديده من مؤثرين وبلوجرز اغلبهم مش مؤهلين للتربيه ولا عارفين خصوصيه المجتمع اللي عايشين فيه فبتطلع اجيال فاكره ان الحياه كلها رحلات ولبس وسفر وردود سريعه وتعليقات وتريقه وان اي مشكله تتحل ببوست او بفيديو دقيقه الخطر الاكبر ان السوشيال خلقت فجوه اجيال جوه البيت الواحد الاب والام بيتكلموا لغه والولاد بيتكلموا لغه تانيه خالص لغه الميمز والتريندات والتحديات اللي ممكن توصل لاذى جسدي او نفسي وبقت الاسرار العائليه بتطلع على العام خناقه بين زوجين تتحول لمحتوى وصوره اكل تنزل استوري ومشكله في المدرسه تتعرض على جروب عشان ناخد راي الناس وبكده ضاعت هيبه البيت وضاع مفهوم الخصوصيه اللي كان بيحمي الاسره من بره بقينا بنستقبل افكار غريبه عن مجتمعنا عن الجواز والطلاق والتربيه والصداقه وبنصدقها لانها بتتكرر قدامنا كل يوم وبشكل جذاب ومبهر وبننسى ان ورا كل صوره فلاتر وورا كل حياه مثاليه على الانترنت مشاكل حقيقيه محدش بيتكلم عنها كمان الادمان على السوشيال سرق الوقت اللي كان مخصص للقاعده مع بعض بقت مفيش حوارات على العشا ولا سؤال عن اليوم ولا حضن قبل النوم بقى فيه اسكرول لا نهائي واشعارات بتقطع اي تركيز وبتعمل توتر وعصبيه وبتخلي الصغير يبص للموبايل اكتر ما يبص لامه والكبير يفضل قاعد بالساعات يتفرج على مشاكل ناس ميعرفهاش وسايب مشاكل بيته متراكمه النتيجه تفكك عاطفي وبعد وبرد في العلاقات واطفال بتدور على القدوه في ناس غريبه مش في ابوها وامها ومراهقين بيصدقوا اي كلام منسوب لخبير نفسي او دكتور على التيك توك وبينفذوه في البيت من غير وعي اخطر حاجه ان السوشيال بتخلق مقارنات قاتله بتخلي الزوجه شايفه ان جوزها مقصر والزوج شايف ان مراته مش زي اللي بيشوفهم والولاد شايفين اهلهم دقه قديمه ومش فاهمينهم فبتزيد الخلافات وبتقل الرضا وبننسى نعم كتيره عندنا عشان بنبص على اللي ناقصنا عند غيرنا الحل مش اننا نقفل النت ولا نمنع الموبايلات الحل ان الاسره ترجع تاني تقعد مع بعض وتحط قواعد للاستخدام ويكون فيه وقت مقدس من غير شاشات ويكون الاب والام هما اول مصدر معلومات وقدوه لولادهم مش السوشيال ولازم نعلم ولادنا النقد والتفكير قبل ما يصدقوا اي حاجه بيشوفوها ونفهمهم الفرق بين الواقع وبين اللي بيتعرض على الشاشه لان البيت اللي بيقع من جوه عمر السوشيال ما هتبنيه
