ثقافة و فن

النمله لاتزال في ودني ..

النمله لاتزال في ودني ..

 

 

كتب : حاتم عبدالهادي السيد

 

يعد أحمد بخيت أحمد أحد كتاب الشباب في مجال القصة المصرية السيناوية المعاصرة…

وهو يختلف عن ماعليه من الكتاب في اختيار الفكرة، والكتابة باللهجة العامية مثل أحسان عبدالقدوس وكثير من كتاب القصة والرواية في الستينات والسبعينات..

تتميز قصة الكاتب أحمد بخيت بدونها أكثر عمقا، عبر لغة عامية صرفة، وأسلوب متنام لهارموني السرد التناغم الممتد…

نقدم له أولى قصصه للنشر، ونثمز تجربته الجميلة الرائدة… ونقدم قصته الجميلة :

 

( النملة لا تزال في ودني).

قصة

أحمد بخيت

شمال سيناء

 

..فرويد قال: كلنا مرضي نفسيين …دي معلومه ملهاش لازمة في بداية الحدوته حطتها في الأول علشان جمعية المرأه المتوحشة بتدور علي مقالات دكتور هوبنز وحالفه تقطع …رقبته ..فقررت اني ابطل مقالاته خصوصا ان المرأه قنديل البحر بتعض علي شفايفها بعد ما طلعت عليها اللقب دا…

بعد العشاء اخدت مخده وفرشه ودورت علي مكان هادي ارمي فيه نفسي واداعب افكاري بعيد عن البشر

قدام بيتي فيه مكان رمله صفرا نضيفه فرشت فرشتي وحطيت راسي ع المخده وولعت سجاره وشغلت اغنيه للعملاق فريد الاطرش اسمها: ها قد عدت يا يوم مولدي ..

حسيت بودني بتزن ..اتنفضت …حسيت بقرصه جامده جوا اعماق وداني اليمين نورت كشاف الموبيل لقتني نايم فوق قرية نمل احمر صغير شكله غريب وعجيب …قلت الظاهر ان فيه نمله دخلت جوا وداني ..طلعت منديل وفضلت احفر في وداني لكن ماقدرتش اطلع النمله …عادي نمله وهتموت مش هيكون ليها تاثير يذكر اكيد هتفطس جوا وداني بالشمع بتاع الاذن …

رجعت البيت ونمت بدئت احس بتعب اكتر وصداع …قررت اني اروح للدكتور …في العياده قابلت ممرضه اتكسفت احكيها عن اوجاعي ..استنيت دوري ودخلت للدكتور افتكرني بهزر وكتبلي علاج قطره لتنظيف الودان …مشيت في الشارع حاسس ان وداني بتزن اكتر …قعدت علي قهوه بعاني من الصداع وطلبت شاي وشيشه كنتلوب..حسيت ان الدخان بيثير النمله وبيخيلها تنشط اكتر وتعيش جوا دماغي فسادا …عربي صبي القهوه واقف قدامي بيكلمني وانا مش سامعه …بدء يكلمني بلغة الاشاره …الموضوع بدء ياخد منحني خطير …

اللي خايف منه ان النمله تاكل طبلة ودني !!!

فعلا لما رحت اكشف تاني عند الدكتور الوغد البائس اكتشف ان النمله اكلت جزء كبير من طبلة ودني وعملت خرم ونفق والله اعلم النمله ممكن تكمل طريقها للمخ …ضحك الدكتور …ضحكت الممرضه ..انا بكيت ..مخي النضيف هتاكله نمله هو انا ناقص مصايب يا اللهي ..

الخبر انتشر ..والاشاعات كترت عني الدكتور فضحني ع النت ونزل صورة الاشعه بتاعتي والنمله بتحفر نفق جوا الفص الايمن من مخي …لدرجة ان فيه طفل صغير سالني هو انت هتتحول زي سبايدر مان وتبقي عندك قوه خارقه وتبقي الرجل النمله ياعم احمد …

قولتله مين قالك كدا يابن المفكوكه ..قالي امي اللي انت مسميها قنديل البحر ….انا هروح اتعالج واطلع النمله قبل ما تاكل مخي وهحاسب اللي قلك ع المعلومه دي ..

…مابين اجهزت سونار لاجهزة منظار احتار الاطباء في تحديد اتجاه النمله داخل الجمجمه بس اكتشفو ان فيه تآكل في الفص الايمن من المخ المسئول عن الذكريات

الدكتور صارحني بالحقيقه وقالي انت هتفقد جزء كبير من زكرياتك ياحمد متزعلش يابني …وبكي

طرت من الفرحه وقلتله ابدا ابدا يا دكتور انا زكرياتي كلها سواد وهباب يا رب يقدر النمله وتاكل الزكريات السودا دي علي قد ما تقدر …

الدكتور انبهر وقال: فعلا دا يبقي انجاز واكتشاف طبي عظيم ..كدا هنخدم الانسانيه ونقدر نعالج الناس اللي عندها اكتئاب وامراض نفسيه بسبب زكرياتها القديمه الاليمه..

بدئت اتشهر وانتقل من ايد العالم دا للعالم دا ولفيت اعظم مستشفيات الكوكب في انتظار تحقيق اعظم اكتشاف طبي

مرت الايام ومبقتش فاكر اي حاجه حسيت اني ابيض معنديش اي زكريات قديمه اليمه ..فرحت..

عالم حشرات صمم ييجي المكان اللي فيه قرية النمل اللي نمله منهم دخلت جوا وداني واخد كفايته من النمل وبداء يبيع لباقي العلماء …

المشروع نجح وناس كتير اتعالجت وقدر النمل انه ياكل زكرياتهم الاليمه …السلام عم العالم …المرضي النفسيين اختفو …الكوكب اتطور وعمت فيه الافراح …اختفت اغاني عبدالباسط حموده ..وحسن الاسمر وكل اغاني الكئابه ..اما النمله فهي لا تزال في ودني …

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى