شرح قانون التصالح الجديد بعد صدور قانون جديد للتصالح وإلغاء القانون القديم ايه مصير 2 مليون و 800 الف ملف أتقدم في ظل القانون السابق
مهندس الشاعر… يجيب على كل هذا
وايه الفرق قانون التصالح الجديد عن القانون القديم ؟
هل التقديم في التصالح الزامى ولا لا ولو ماقدمتش ايه يعنى ممكن تعمله الدولة فيا ؟
ايه مصير المباني المتعدية على خطوط التنظيم ؟
ايه مصير العقارات ذات البناء المتميز ؟
هل لو العقار بتاعى متجاوز قيود الارتفاع والطيران المدنى اقدر اتصالح فيه ؟
لو العقار خارج الحيز العمرانى سواء كان سكنى او غير سكنى اقدر اتصالح عليه ؟
طيب هو لو عندى مخالفة ماينفعش تتزال اقدر اتصالح عليها ؟
مين اللى حيعاين المكان لجنة من الدولة ولا ممكن مكتب استشارى وتمشى الأمور ؟
حدفع كام جدية وحدفع كام لسعر المتر وحدفع على قد ايه ولو دفعت كاش ليا تخفيض ؟
ايه الأوراق المطلوبة للتقديم وازاى طلبى يقبل ؟
لو انا بانى أعمدة تقدر استكمل اعمال ؟
لو انا بنيت خلال الأيام اللى فاتت في هوجة البنا اقدر اقنن وضعى ؟
لو الأرض مملوكة للدولة اقدر اتصالح على المبنى اللى عليها ؟
خلينا نبدأ ونقول ان احنا داخلين القانون الجديد ب2 مليون و800 الف ملف في رقبتنا من القانون اللى فات ده اللى ظاهر لكن اللى ماحدش يعرفه ان 4% بس من اللى قدموا في ظل القانون اللى فات هم اللى يقدروا يكملوا على القديم باسعاره ونظامه و96% اترفض طلبهم فحضرتك بشكل كبير حتسيبك من الطلب بتاعك اللى قدمته وحتقدم مع الناس وماتخافش على الفلوس اللى دفعتها في طلبك القديم كده ولا كده هيحصل مقاصة بين الطلبين وحتتحسبلك فلوسك اللى دفعتها
طيب ايه الفرق مابين قانون التصالح الجديد والقديم ؟
الفرق كبير طبعا تقريبا كده كل المخالفات اللى ممكن تتخيلها دلوقتى تقدر تتصالح عليها في القانون القديم كان فيه محظورات كان لايمكن باى حال من الأحوال انك تتصالح عليها .. كل ده اتشال في القانون الجديد
طبيعى بعد اللى حصل في قانون التصالح قبل كده والناس اللى قدمت حيجى في دماغك سؤال منطقى جدا انا ايه اللى يخلينى ادفع فلوس واتصالح ده كل اللى محتاجاه الدوله ان تاخد مننا فلوس والدولة ماتقدرش تعمل معايا حاجة ؟؟
حقولك كان ممكن افهم كلامك ده لو ماكنش فيه نص المادة 10 اللى بتقول ان حضرتك محظور عليك توصيل المرافق ولا مايه ولا غاز ولا كهربا طالما ماقدمتش على التصالح … حتيجى تقولى ان العقار عندى فيه مرافق بالفعل حقولك كمل قراية للمادة حيغلوا عليك الكهربا والماية والغاز وحيشيلوا من عليك الدعم المستحق عليك
وده يعنى حاجة كبيرة ؟
خلينا اشرح لسيادتك الدولة بتدعمك تقريبا في الكهرباء بنسبة 60%
يعنى لو بتدفع شهريا 400 جنية يبقى حتدفع 1000 جنيه شهرى ده في الكهرباء بس
وطبعا وفى ظل الظروف اللى احنا فيها دى وتخفيف الاحمال الدولة ما حتصدق أصلا انها تعمل كده وحيكون عنده سند قانونى لده
ده غير ان ربط التسجيل في الشهر العقارى بالتصالح في القانون الجديد بمعنى اننا احنا على أبواب الزام الجميع بالتسجيل لاعتراف الدولة بيك كمالك شقة مش حتعرف تسجل عقدك لو كنت مش مقدم تصالح
فلو فكرت انك حتوفر المبلغ اللى حتدفعه في التصالح حتلاقي نفسك دافع اضعافه سنويا في الدعم اللى حيتشال من عليك والجزاء ده بقى حيستمر معاك ومع اولادك ومع احفادك باذن الله
لوكان العقار بتاعك
متعدى على خطوط التنظيم
او كان عقار مميز يعنى كان ليه طابع معمارى مميز وحضرتك بوظته
او كان متجاوز قيود الارتفاع والطيران المدنى
تقدر تتصالح عليه زيك زى غيرك وده طبعا من مميزات القانون الجديد لان قانون التصالح السابق كان بيحظر كل ده لكن الوضع اختلف في القانون الجديد
لو كانت الأرض بتاعتك خارج الحيز العمرانى بس قريبة منه تقدر وفقا للقانون انك تتصالح عليها طالما انها قريبة طيب مين اللى هيحدد انها قريبة من عدمه ؟ كل مجلس محلىى هو اللى هيحدد حدود القرب قد ايه بس خلينا نقول ان تقريبا كل الناس خارج الحيز العمرانى هتتصالح
ومش حيكون فيه مشكلة في ده
برضه نقطة مهمة تغير الاستخدام بمعنى انك لو عندك مكان كان سكنى وبقى ادارى او بقى تجارى او العكس حتقدر دلوقتى تقدم على طلب بالتصالح زيك زى غيرك
ايه الأوراق المطلوبة علشان تقدم على التصالح ؟
1/ صورة بطاقة الرقم القومى
2/ صورة عقد ملكيتك للمكان
3/ حتسدد رسم الفحص
4/ حتسدد جدية التصالح
4/ حتعمل نسختين من الرسم المعمارى للمكان عندك
5/ حيكون معاك تقرير هندسى عن السلامة الانشائية
6/ شهادة قيد من نقابة المهندسين للمهندس مصدر التقرير
7/ هتحتاج صور من الرسومات للى طلع بيها الترخيص وصورة من الترخيص لو موجود معاك
8/ شهادة من المركز التكنولوجى بجهة ولاية المخالفة بتاعتك يعنى انت تبع حى ايه
9/ لو الأرض دى ارض مملوكة للدولة لازم تجيب ما يفيد انك خلصت مع الدولة فيها وقننت وضعك
10/ حتقدم مستند ان تاريخ مخالفتك قبل 15 أكتوبر 2023 وده عن طريق إيصال من المرافق او شهادة من الضرائب العقارية او صحة توقيع
انت ممكن تحس ان كل ده كتير بس ده مش صح تعامل مع حد مختص واعمله توكيل وكل ده هيخلص بسرعه جدا
نيجى لاهم نقطة احنا هندفع كام
اول ما حتقدم الورق حتدفع حاجة اسمها رسم فحص من 500 جنيه الى 5000 جنيه وده بيتحدد حسب مساحة المكان بتاعك
بعد كده حتدفع جدية التصالح بتاعتك ودى الدولة محددحهالك علشان متتعبش في حسابها
لو المخالفة بتاعتك في الرسومات حتدفع جدية 20 الف جنيه
ولو تغيير استخدام الجدية حتبقى 120 الف جنيه
نيجى بقى للبناء بدون ترخيص وده ليه كذا شكل وكل شكل ليه قيمة الجدية بتاعته
يعنى مثلا لو بنيت سور حتكون الجدية 20 الف جنيه
ولو المخالفة بتاعتك ردود بس حتدفع جدية 40 الف جنية
ولو الروف عندك مترخص غرفتين وانت زودت حتدفع جدية 50 الف جنيه
ولو بنيت روف كامل حتدفع جدية 80 الف جنيه
اما بقى لو حضرتك استغليت الفترة اللى فاتت وبنيت عمارة كاملة حتدفع من 160 الف جنيه الى 250 الف جنيه كجدية تصالح للمبنى كاملا
طيب فيه رسوم تانية … اه طبعا كل الأوراق والمستندات اللى تحنا ذكرناها من شوية بالإضافة الى رسم اللجنة الفنية حيكون متوسط المصروفات 50 الف جنية بخلاف قيمة الجدية
سؤال دارج .. لو انا ساكن في عمارة مكونة من عدة أدوار اقدم مع نفسى احسن ولا العمارة كلها تقدم في طلب واحد توفيرا للنفقات
الصح انك تقدم لوحدك لان نموذج التصالح بيطلع باسم واحد بس واخرون وبيطلع مرة واحدة فالافضل ان تكون شقتك ليها نموذج تصالح خاص بيها بس لو ده اكتر من امكانياتك مش حيكون قدامك غير انك تقدم مجمع بس حتستنى بقى اللجنة الفنية تبت في امرك وتحددلك معاد معاينة على مزاجها عكس لما تقدم لوحدك ممكن اى مهندس معتمد يقدر يخلصلك الدنيا
بمجرد تقديمك للتصالح حتكون قدامك فترة لا تتعدى 6 شهور بس تخلص كل الأوراق بتاعتك والا حيعتبر الطلب بتاعك كان لم يكن
وبمجرد ماتقدم اوراقك وفى خلال 15 يوم اللجنة الفنية حتخلص طلبك تماما وتقولك روح ادفع باقى قيمة التصالح
حتروح تدفع حسب المخالفة بتاعتك
لو كانت مخالفتك هي التعدى على خطوط التنظيم او لو متعلقة ان المبنى بتاعك ليه طابع معمارى متميز او لوكنت متعدى على قيود الارتفاع المقدره للطيران المدنى حتدفع 150% من قيمة المتر المقدر لمخالفتك
اما لو كنت بانى بدون ترخيص ومتجاوز كمان الاشتراطات التخطيطية والبنائية حتدفع 100% من قيمة المتر
ولو كان البناء بدون ترخيص بس مطابق للاشتراطات التخطيطية والبنائية حتدفع 50 % من قيمة المتر
تغيير الاستخدام حتدفع 100% من المخالفة
طيب لو المكان عندك مرخص وكل مخالفتك هي مخالفة رسوم انشائيةومعمارية بس حتدفع 15% بس من المخالفة
طيب لو مطابق الرسوم المعمارية ومخالف الرسوم الانشائية حتدفع 10% من المخالفة
طيب لو مطابق الرسوم الانشائية ومخالف الرسوم المعمارية حتدفع 5% بس من المخالفة
طيب لو عندك كذا مخالفة من دول حتكون كل مخالفة بنسبتها ونجمع في الاخر
وفى كل الأحوال لو قررت تدفع كاش حيتخصملك 25 % من قيمة المخالفة
وتقدر تسدد على 3 سنين بدون فوائد
او تسدد على خمس سنين بس هيتحاسبوا
5 % فايدة لو التقسيط على 4 سنين
7% فايدة لو التقسيط على 5 سنين
وطبعا لو المصالحة بتاعتك حتترفض لسبب اولاخر ودايما السبب الأهم انك تقول انا قادر اخلص كل ده مع نفسى ومش محتاج حد انت حر طبعا بس كل ده محتاج حد فاهم ودارس الإجراءات دى كويس اوى علشان اى غلطة حتكلفك كل الفلوس اللى دفعتها وحيزيد عليها انك حتدفع 3 اضعاف سعر المتر لو قررت تكمل التصالح بعد ما يترفض …
اخر نقطة انك لو عندك مكان وعاوز تعمل عليه تعلية او إحلال وتجديد ناس كتير قالت ان ده مش منصوص عليه في قانون التصالح مع ان الامر واضح جدا انك حتقدر تعلى او تعمل إحلال وتجديد بشرط انك تتم اعمال التصالح وتاخد نموذج 10 وبعد كده حتقدم طلب منفصل فيه اصل النموذج بتاعك وحتاخد موافقة بالتعلية او بالاحلال والتجديد
احجز موعدك الان على الرقم التالى
01003334327ونحن في خدمتكم م.. إبراهيم الشاعر
