شريف الحسيني يكتب عن شم النسيم
كنا زمان نستنى شم النسيم كأنه عيد رسمي من غير قرار جمهوري ونجهز له من قبلها بأسبوع ونحوش من المصروف عشان الفسيخ والرنجة والترمس ونظبط الخروجة مع العيلة او الصحاب ونحجز الجنينة قبل ما الناس تصحى.
حاليا لما تدور في أصل الحكاية تلاقي شم النسيم مش اختراع جديد ده أقدم عيد عرفته البشرية وعمره معدي الخمسة آلاف سنة وبدأ عند أجدادنا المصريين القدماء .
وكان اسمه شمو يعني بداية الزمان او بعث الحياة وكان مرتبط بفصل الربيع واكتمال الحصاد وتعامد الشمس على وجه التماثيل في المعابد.
وكان يوم اجازة لكل البلد من الملك للفلاح يخرجوا كلهم للزرع والخضرة والنيل وياكلوا أكل معين له رمزية البيض رمز بداية الخلق وكانوا يلونوه ويكتبوا عليه أمنياتهم ويعلقوه على الشجر والفسيخ والسمك المملح رمز الخير والوفرة عشان النيل.
كان بيجيب السمك والبصل الأخضر رمز طرد الأرواح الشريرة والشفاء من الأمراض والخس رمز الخصوبة والترمس والملانة تسالي الربيع والعادات دي كملت معانا بالحرف من غير ما حد يعلمنا ولا يقولنا ليه بس الدم بيحن للتاريخ لوحده كل سنة في نفس المعاد تلاقي البلد كلها واخدة نفس القرار ونفس السبت ونفس الأكل ونفس الخناقة على مكان القعدة تحت الشجرة ونفس النومة بعد الأكل ونفس الصداع ونفس الحلفان ان دي آخر مرة هناكل فسيخ ونفس الكذبة اللي بنكررها كل ربيع شم النسيم هو اليوم الوحيد اللي المصريين بيتفقوا فيه من غير مظاهرات ولا هتافات يتفقوا على الخروج والأكل والضحك ويقفلوا موبايلاتهم شوية ويفتحوا قلوبهم شوية ويرجعوا عيال بتجري في الجنينة وتلون بيض وتاكل ترمس وتتصور صور كلها شمس وخضرة ووش راضية الغريب ان العالم كله عنده أعياد ربيع بس محدش بيعملها بطريقتنا احنا بس اللي حولنا اليوم لتظاهرة شعبية للفسيخ وخلينا ريحة الربيع عندنا ريحة سمك مملح ودي عبقرية شعب بيحب الحياة حتى لو بطنه هتوجعه بالليل الخلاصة شم النسيم مش مجرد يوم اجازة ده كارت الهوية بتاعنا وشهادة ميلادنا كمصريين بتتجدد كل سنة لما نخرج للشمس وناكل نفس الأكل ونقول نفس النكت ونرجع بيوتنا تعبانين ومبسوطين ومستنيين السنة الجاية عشان نعيد نفس الغلطة بنفس الحب
