عادل رستم يكتب: قطايف صنعت في مصر
هحاول أبقى في المقال ببساطة برنامج قطايف للفنان سامح حسين. ما نقدرش نقول عليه من النجوم اللي مكسرة الدنيا أو من الفنانين اللي المنتجين بيتمنو يشتغلو معاهم.. الراجل دا فجأة بقى اسمه على كل لسان وتوارى من خلفه عشرات البرامج اللي بيتصرف عليها ملايين .. وبقى ليه مشاهدين بالملايين أيوة بس دي ملايين حقيقية ومش بتتصرف من بنوك لا دي بتدوم العمر كله .. أصل حب الناس ملوش تمن.
الفنان سامح طبخ طبخه ملحها مظبوط.. وتحس كدا وانت بتشوفه انه بيكلمك انت لوحدك، بينصحك وبيحبك ونفسه تتغير، أداء عبقري أصل زمان قالوا اللي بيطلع من القلب بيوصل للقلب أو قالوا كمان من القلب للقلب رسول.
القطايف طعمها بطعم مصر الجميلة بأزهرها ونيلها بشوارعها وحواريها بخان الخليلي وشبرا والمطرية والعباسية واسكندرية ومطروح والسلوم والصعيد.
قطايف أدت كتف قانوني لكل الاستوديوهات أو الفضائيات، والحكم كان كل مصر، زي ما قال الفنان سامح حسين حاسس إني لسة بحلم .. أيوه احلم كمان وكمان وغيرك يحلم دا الوقت اللي تتحقق فيه كل أحلام إعلامنا الرائد، لما تكرم من ماسبيرو قال نفسي ماسبيرو ترجع .. ياه على عمق المعنى..
وفيه بطل تاني وتالت مع الفنان سامح.. اللي كتب واللي هو أصل الحكاية.. دا دقيق القطايف دقيق من قمح بلدنا من مزارعنا لشاشة القلوب والقبول .. قطايف صنعت في مصر وبعقول مصرية أيها السادة.
